Այն թեզը, որ ադրբեջանցիների եւ թուրքերի միջեւ փոխհարաբերությունները տեղավորվում են «մի ժողովուրդ՝ երկու պետություն» բանաձեւի մեջ, անհեթեթություն է:
Ադրբեջանցիները՝ որպես շիաներ, պարբերաբար կոտորվել են թուրքերի կողմից, ովքեր դեռ վաղուց տանել նրանց չէին կարողանում: Սուննիական մոլեռանդությունը որեւէ կապ չունի շիաների հետ: Ավելի վատ, քան թուրքերի վերաբերմունքն էր ադրբեջանցիների նկատմամբ, թերեւս ադրբեջանցիների վերաբերմունքն էր թուրքերի նկատմամբ: Այս մասին NEWS.am-ի հետ զրույցում ասաց Մերձավոր Արեւելքի ինստիտուտի նախագահ Եվգենի Սատանովսկին:
Ինչպե՞ս եք գնահատում Թուրքիայի ակտիվությունը Հարավային Կովկասի տարածաշրջանում: Ի՞նչ նպատակ է այն հետապնդում՝ աջակցելով Բաքվին:
Թուրքիան միշտ աջակցում է Ադրբեջանին՝ ելնելով ադրբեջանական նավթի եւ գազի հետ կապված իր շահերից: Ոչ մի այլ բան այնտեղ չկա: Հայ-ադրբեջանական սահմանին էսկալացիայի կապակցությամբ Թուրքիայի ղեկավարության մտահոգությունները նույնպես կապված են այս գործոնի հետ: Ադրբեջանի եւ Հայաստանի միջեւ հակամարտության իրավիճակի վրա, հաշվի առնելով նկարայի քաղաքականության ուղղվածությունն Օսմանյան Թուրքիայի վերածննդին իր գլխավորությամբ, Էրոդգանի համար կարծես «մեղր է քսած»:
Ինչպե՞ս են միմյանց հետ կապված Ռուսաստանի Զինված ուժերի զորավարժությունները եւ թուրք-ադրբեջանական համատեղ զորավարժությունները:
Այս երկու զորավարժությունները ոչ մի կապ չունեն միմյանց հետ: Ռուսաստանում դրանք վաղուց էին նախատեսված: Ադրբեջանա-թուրքական ռազմական կապերը կապ ունեն Հայաստանին վախեցնելու հետ: Դժվար թե դա որեւէ առնչություն ունի Ռուսաստանին վախեցնելու հետ, քանի որ Անկարան դժվար թե փորձի ինչ-որ բան անել եւ կանգնել ցավոտ վերքի վրա՝ հաշվի առնելով Սիրիայում տեղի ունեցած փորձը:
Ի՞նչ փոփոխություններ են տեղի կունենան ղարաբաղյան հակամարտության կարգավորման բանակցային գործընթացում։
Կան կոնֆլիկտներ, որոնք լուծում չունեն: Լեռնային Ղարաբաղի հակամարտությունը հենց այնպիսին է, որը լուծում չունի: Դա կշարունակվի առնվազն մինչեւ այն ժամանակ, քանի դեռ Հայաստանը, Ադրբեջանը եւ Լեռնային Ղարաբաղը չեն մտել որեւէ պետության կազմ։ Այստեղ ուրիշ ոչինչ հնարավոր չէ հորինել: Այստեղ միակ հետաքրքիրն այն է, թե ինչպիսի պետություն դա կլինի: Մի բան պարզ է. ցավոք, ոչ ոք չի պատրաստվում վերակենդանացնել Սովետական Միությունը:
Ի՞նչ շարունակություն կարող է ունենալ հայ-ադրբեջանական ազգամիջյան բախումները, որոնք գրանցվում են ամբողջ աշխարհում:
Հայերի եւ ադրբեջանցիների միջեւ ազգամիջյան բախումները, որոնք տեղի են ունենում աշխարհի տարբեր մասերում, ապագայում կարող են օգտագործվել որեւէ մեկի կողմից: Ինչ վերաբերում է այս ամենի հնարավոր կազմակերպված լինելուն, ապա Դաշնակցություն կուսակցությունն ունի իր կապերը, ադրբեջանցի եւ թուրք «գայլերը»՝ իրենց կապերը: Փաստն այն է, որ մարդիկ, լինելով նույնիսկ հարեւաններ, խաղաղ գոյակցություն էին օտար երկրների տարածքում եւ հանկարծ սկսեցին կռվել: Ռուսաստանում դա վատ կվերջանա երկու կողմերի համար էլ: Ռուսաստանի ղեկավարությունը թույլ չի տալիս որեւէ արտաքին հակամարտության մտնել ռուսական տարածք, իսկ նախկինում թույլ չէր տալիս մտնել խորհրդային տարածք: Սա ծայրաստիճան սխալ է համարվում: Առաջ դա կանխվում էր սովետական ԿԳԲ-ի կողմից, իսկ այժմ կկանխվի Ռուսաստանի Անվտանգության դաշնային ծառայության կողմից եւ՝ ամենախիստ ձեւով: Կվռնդեն երկրից՝ առանց մուտքի իրավունքի: