Չկա մեկը, որ ինձանից շատ գիտի իր արածները Ղարաբաղում. Զորի Բալայանը՝ Ռոբերտ Քոչարյանի մասին

 

Картинки по запросу զորի բալայան

Երեկ մի խումբ քաղաքական գործիչներ, հասարակական տարբեր խավերի ներկայացուցիչներ հանդես են եկել հայտարարությամբ: Ըստ տարածված հայտարարության` ստորագրահավաք է իրականացվել` ընդդեմ Հայաստանի դատաիրավական համակարգի, դատավորների եւ Սահմանադրական դատարանի հանդեպ իրականացվող բիրտ ճնշումների:

«Ակնհայտ է` «Մարտի 1»-ի` դատաքննության փուլում գտնվող գործը չի տալու գլխավոր հարցի պատասխանը` ով է մեղավոր 10 մարդու կյանքից զրկելու համար: Սա «Մարտի 1»-ի գործ չէ, այլ ԼՂՀ առաջին եւ ՀՀ երկրորդ նախագահի հանդեպ քաղաքական հալածանք, ցանկացած գնով նրան անազատության մեջ պահելու սեւեռում»,- նշված է հայտարարությունում: Ստորագրահավաքին միացածները իշխանություններին կոչ են արել դադարեցել հակասահմանադրական գործընթացը, զերծ մնալ հակապետական գործողություններից ու պահանջել են փոխել Ռ. Քոչարյանի խափանման միջոցը:

Երեկ «Ժողովուրդ» օրաթերթը զրուցել է Արցախի հերոս, գրող, հրապարակախոս Զորի Բալայանի հետ:

Պարո՛ն Բալայան, Դուք էլ եք միացել այն ստորագրահավաքին, որով պահանջվում է ազատ արձակել ՀՀ երկրորդ նախագահ Ռոբերտ Քոչարյանին: Ինչո՞ւ, կարծում եք Ձեր դիմումին ընթա՞ցք է տրվելու:

-Այո, միացել եմ, կարծում եմ` կարելի է պահանջը կատարել, ինչ ասեմ:

-Բայց 2008 թվականի մարտի 1-ի զոհերի ծնողները պահանջում են, որպեսզի Ռ. Քոչարյանը գտնվի կալանքի տակ ու կրի իր պատիժը:

-Այդ հարցը այնքան բարդ է, ես այդ բոլորը հասկանում եմ, ես չեմ կարող ասել` այո կամ ոչ, ես, հավատացեք, հասկանում եմ: Այո, գիտեմ, որ իրենց հարազատներին են կորցրել, ցավալի, շատ ցավալի բան, մի կողմից իրենք են, մի կողմից էլ Ռոբերտ Քոչարյանն է: Ու կարծում եմ, որ չկա մեկը, որ ինձանից շատ գիտի իր արածները Ղարաբաղում, խնդիրը դրա մեջ է: Եթե պետք է պատժեն, ապա թող դա անեն օրենքի բոլոր կետերով: Ես դրա կողմնակիցն եմ: Ես գիտեմ, որ ժամանակին գերխնդիրներ են եղել, որ ինքն է կարողացել լուծել, ես դրա մասին իմ գրքերում եմ գրել:

-Ձեր կարծիքով` Ռ. Քոչարյանը մեղավորություն չունի՞ մարտի 1-ի իրադարձություններում:

-Ես չեմ ուզում դրա մասին հեռախոսով խոսել, հավատացեք, որ ես կողմնակից եմ, որպեսզի մտածենք նաեւ ծնողների մասին` չմոռանալով նաեւ Ռ. Քոչարյանի կատարած գործերը: Ես շատ լավ ամեն ինչ հասկանում եմ: Հավատացեք, շատ դժվար իրավիճակ է:

Զրուցեց ՍՈՆԱ ԳՐԳՈՐՅԱՆԸ

(Visited 384 times, 1 visits today)